Waagacusub English News Clickhere

Somalia:Local media takes tough stand Clickhere

Faalo;-Maxamed Faroole iyo Qorshaha Afduubka Saxaafada Puntland.

Faalo 18 March 2009 Waagacusub Media

Tan iyo intii Madaxweynaha hada xilka haya ee Puntland Dr.Cabdiraxmaan Faroole loo doortay jegada Madaxtinimada Puntland sanadkan horaantiisa, waxaa isa soo taraya cadaadiska saxaafada Puntland uga imaanaya Wiil uu dhalay Madaxweynaha oo lagu magacaabo Maxamed Faroole, kaasi oo ah Mulkiilaha Radio Garowe.
 


Maxamed Faroole ayaa qorshaha uu ku cadaadinayo tahay mid salka ku heysa in dhamaan xogta Dowlada aan si siman loogu gudbin saxaafada ayadoo Radio Garowe qadaraas khaas ah ku qaadaneyso dhamaan wararka Dowlada Puntland iyo waliba gudbinta Xogta kasoo baxday Laamaha Dowlada Puntland.

Arrimahan ayaa ah kuwo heerar kala duwan soo maray, ayadoo ay hada mareyso meeshii ugu xasaasisaneyd kadib markii Maxamed Faroole uu kala diray suxufiyiintii khaaska ahayd ee u shaqeyn jiray Madaxtooyada Puntland.

Maxamed Faroole oo hada ku wehliya Safarka Madaxweynaha Puntland ku jooga dalka Itoobiya, ayaa sidoo kale mamnuucay in xogta safarka Madaxweynaha lagu daabaco websitekii Dowlada Puntland lahayd ee Puntlandgovt.com, kadib markii suxufiyiintii Madaxtooyada uu Maxamed Faroole u diiday inay raacaan diyaaradii uu Cabdiraxmaan Faroole ku tagay dalka Itoobiya, dhamaan warbixinadii Madaxweene Faroole ayaa lagu wareejiyey Websiteka Radio Garowe.

Maxamed Faroole oo kameradiisa u qaatay inuu sawirada Madaxweynaha iyo kulamadiisa Puntland kusoo daabaco bogiisa Garoweonline, ayadoo sidoo kale cunaqabateyn kusoo rogay suxufiyiinta kale ee ku sugan magaalada Garowe.

Dhaq dhaqaaqa Maxamed Faroole oo ah mid aan horey looga baran Wiilashii ay dhaleen madaxweynayaashii hore ee Puntland ayaa ah mid ay si weyn u hadal hayaan shacabka Puntland.

Hadaba dar darta Maxamed ayaan ku koobneyn halkaasi, waxaa sidoo kale dhawaan isa soo tarayey hanjabaayada suxufiyiinta warbaahinta Puntland u shaqeeya ay kala kulmaan ciidamada Madaxtooyada illaalada ka ah arrintaasi oo aan illaa iyo hada sabab loo hayn, ayaa la sheegayaa inuu ka danbeeyo Maxamed Faroole oo amar qayaxan kusiiyey wiilasha illaaliya Madaxweynaha inaysan soo siideyn suxufiyiin uusan asagu fasixin.

Dikereetooyinka kasoo baxa Madaxtooyada Puntland ayaa ah hada mid ay suxufiyiinta Puntland u doontaan xaafiiska Radio Garowe ee magaalada Garowe, kadib markii Maxamed Faroole la wareegay in uu asagu qeybiyo wixii qoraal ah oo Madaxtooyada kasoo baxa, halka horey ay Madaxtooyada xogheynteeda si gaar ah ugu diri jirtay dhamaan Warbaahinta ku sugan magaalada Garowe ee caasimada Puntland.

Maxamed Farole oo dhawaan ka qeyb galay kulan ka dhacay magaalada Bosaso oo lagu dhex dhexaadinayey Madaxweynaha iyo suxufiyiin caqabad kala kulmay Madaxtooyada, ayaa asagoo kulankaasi la hadlaya Suxufiyiinta ku sugnaa u sheegay inay Saxaafada Puntland qaarkeed la xiri doono hadii aysan sharciga raacin, waa suu hadalka u dhigayee, hadalkaasi oo ay suxufiyiinta intooda badan u qaateen hanjabaad cad.

Maxamed Faroole ayaa hada wada qorshe ku kacaya $100.000 oo dollarka Maraykanka oo laga saxiixi doono Dowlada Puntland inay ku siiso qandaraas Maxamed Faroole inuu hirgeliyo idaacad iyo telefishin ay dowlada Puntland leedahay, kaasi oo hoos imaan doona Radio Garowe.

Qorshahan ayaa ah mid aan weli lasoo hordhigin Wasaarada Warfaafinta, balse si weyn ugu faanay Maxamed Faroole mar uu magaalada Garowe kula hadlayey suxufiyiin ku sugnaa Madaxtooyada.

Hadaba hadii uu mashruucan hirgalo ayaa noqon doonta Shirkadii ugu horeysay oo Warbaahineed oo Puntland ka jirta (Radio Garowe) oo si gaar ah loo leeyahay oo ay dowlada lacagtii shacabka ka aruurisay ee canshuurta ku maal geliso.

Maxamed Faroole ayey ku tilmaameen dadka u dhuun daloola siyaasada Puntland shaqsi halis ku ah Madaxtooyada Puntland iyo waliba Madaxweynaha Puntland, ayagoo tusaale usoo qaateen talooyinka Maxamed Aabihii siiyo inay kamid ahayd, dhaliiceyntii Madaxweynaha Puntland uu dhawaan dusha uga tuuray Sawiraaga Caanka ah ee Amiin Caamir, oo uu sheegay Madaxweynaha Puntland inuu maxkamad la fuuli doono kadib markii uu soo bandhigay, sawiro lagu muujinayo xiriirka ka dhaxeeyey warshadaha lacagaha Falsada sameeya iyo Maamuolka Faroole.

Taladaasi Maxamed Faroole ka timid isla markaana uu meel mariyey Madaxweyne Faroole ayaa ka fajacisay dad badan oo Soomaali ah kadib markii uu Faroole noqday Madaxweynihii ugu horeeyey oo Shir jaraa’iid u qabta dhaliiceynta Amiin Caamir oo ku nool dalka Canada.

Marka laga yimaado dhanka saxaafada Maxamed Faroole wuxuu sidoo kale ka dhex muuqdaa dhaq dhaqaaq lagu doonayo in lagu hubeeyo beesha uu kasoo jeedo Dr.Faroole, ayadoo si gaar ah uu la taliye aan la magacaabin ugu yahay Taliyaha cusub ee Daraawiishta Puntland oo ay isku jifo yihiin.

Maxamed Faroole ayaan ciidamada kaliya xiriir la lahayn wuxuu sidoo kale kamid yahay xubnaha maalgashtay ganacsiga Aargoosiga ee xeebta Eyl halkaasi oo saldhig u ah burcad badeeda Puntland oo dhinacooda la sheego in xiriir weyn ka dhaxeeyo Maxamed Faroole.

Shacabka Garowe ayaa ayagu ku xanta Dr.Faroole xiligii uu doorashada galay inuu ka helay deeq dhan $200.000 oo dollarka Maraykanka burcad badeeda fadhigeedu uu yahay degmada Eyl ee gobalka Nugaal.

Arintan ayaa waxaa si weyn shaki usii gelisay shacabka kadib markii uu Madaxweynaha Faroole uu diiday in ciidamo uu udiro degmada Eyl si ay ulla dagaalamaan Burcad badeeda halkaasi xarunta ka dhigatay. Balse Faroole ayaa asagu weerar ku qaaday deegaanka Mareero ee Bosaaso oo laga dhoofiyo Tahriibta, halkaasi oo uu dhawaan sheegay inuu kusoo arkay burcad badeed. Waxayna shacabka weli is weydiinayaa degmadii uu kasoo jeeday ee Eyl xiliga uu u diri doono ciidamo wax ka qabta burcad badeeda malaayiinta dollar ku heysata?

Maxamed Faroole ayaa asbuuc lasoo dhaafay markale ay shacabka Garowe si weyn u hadal hayeen kadib markii uu Madaxtooyada u diiday inay galaan Wafdi ka yimid dalka Australia oo ka socday shirkada Range Resourse oo ayadu horey maamulkii cade heshiis kula gashay baaritaanka macdanta iyo Batroolka.

Maxamed Faroole ayaa markii wafdigan oo ka koobnaa 7 xubnood ayna ku jireen sadex nin oo suxufi ah ay gaareen irida hore ee Madaxtooyada u sheegay si toos ah inaysan geli karin xafiiska Madaxweynaha.

Maxamed Faroole oo xiligaasi ku sugnaa irida hore ee xarunta Madaxtoooyada ee Garowe ayaa u sheegay askartii halkaasi taagnaa inay dib u ceshaan, Cadaanka Dalka dhacay, waa sida uu hadalka u dhigayee.

Aritan ayey ka caroodeen wafdigii Australia ka yimid oo dib ugu noqday magaalada Bosaso oo ay horey uga soo degeen. Maxamed Faroole ayaa asagu heysta dhalasho ah dalka Australia, waxaana si weyn loo hadal hayaaa heshiisyo cusub uu wado asaga shaqsiyan oo uu doonayo in shirkado cusub uu ku keeno gobalada Puntland, Maxamed ayaa la hadal hayaa inuu ka shaqeenayo in la burburiyo heshiisyadii hore ee uu maamulka Cade la galay shirkadaha shisheeye..

Isku soo wada duuboo waxaa muuqata Maxamed Faroole inuu noqday shaqsiga ugu muhiimsan ee aan xilka ka hayn dowlada Puntland, hadana ugu awood badan Madaxtooyada Puntland arintaasi oo ay walaac weyn ka muujiyeen shacabkii isbedal doonka ahaa ee reer Puntland.

Adan Cilmi Cabdiraxmaan
cilmi87@gmail.com
Gaalkacyo

Halkaan ka dhageyso Wareysi Madaxa ASOJ

Waagacusub Media: Kulmiyaha Suxufiyiinta Soomaaliyeed

Barnaamijka Tijaabi Codkaaga Part 2 Dhageyso

Halkaan ka akhriso Englishka
Qore By: Elizabeth Withey,
Turjume By: Dahir Abdulle Alasow
Photograph by: Rick MacWilliam,
The Edmonton Journal
Barnaamijka Tijaabi Codkaaga Dhageyso

Dhageyso dabaal dega Gor Gor Media Group

Madaxweyne Geelle oo khudbad dheer jeediyay Halkaan ka dhageyso 

 Murtida iyo Majaajilada Waagacusub Dhageyso

Waagacusub Media