Hogaanka NUSOJ ee sharciga ah waxaa u cadaatay in ay jirto khiyaano iyo hoosaasin. Waxaa nasiib daro weyn ah in lagu hanjabo in sharciga saxaafadda dalka, gaar ahaan qodobadiisa wax caburiya, loo adeegsanayo suxufiyiinta diida in ay u hogaan samaan qoor qabadka hadda socda.

WAR-SAXAAFADEED

Mowqifka NUSOJ ee Guddiga Xalinta Khilaafaadka Saxaafada

25 February 2016

 

Ururka Qaranka Suxufiyiinta Soomaaliyeed ee NUSOJ waxaa uu cadeynayaa mowqifkiisa ku aadan Guddiga Xalinta Khilaafaadka Saxaafada ee la sameeyay 13 February 2016.

 

Ayadoo su’aalo aan looga jawaabin uu ka qabyo shaqada, dhismaha iyo awooda guddiga, NUSOJ oo muujinayso niyad wanaag waxay soo dhaweysay dhismaha guddiga, waxayna u cadeysay in ay kala shaqeyneyso meel marinta go’aanada ay gaaraan waa haddii aysan ka hor imaaneynin dastuurka NUSOJ, madax-banaanida & xornimada ururka iyo go’aanka maxkamada sare ee dalka ee soo baxay 4 February 2016.

 

Maalmihii lasoo dhaafay waxaa ururka soo gaarayay warbixinno aan wanaagsaneen. Waxaa luntay madax-banaanida guddiga, waxaa bilaabatay in la marin habaabiyo shaqadii guddiga, waxaa la isku dayayaa in loo maro guddiga in lagu jabiyo go’aanka maxkamada sare ee dalka, dastuurka dalka iyo dastuurka ururka. Intaa waxaa sii dheer in qaab dhismeedka guddiga lagu xadgudbay, ayadoo lagu darsaday xubno aan la isla ogeyn oo dheeraad ah, ayadoo lagu saleeyay hab beeleed oo la leeyahay beel ayaa ka maqan guddiga oo cabanayso ee halagu soo daro.

 

Hogaanka NUSOJ ee sharciga ah waxaa u cadaatay in ay jirto khiyaano iyo hoosaasin.  Waxaa nasiib daro weyn ah in lagu hanjabo in sharciga saxaafadda dalka, gaar ahaan qodobadiisa wax caburiya, loo adeegsanayo suxufiyiinta diida in ay u hogaan samaan qoor qabadka hadda socda.

 

NUSOJ waxay cadeyneysaa in Wasaarada Warfaafinta dowladda federaalka ay qeyb ka tahay khilaafka la sheegay in uu ka jiro saxaafada. Ururku waxaa uu maxkamada sare la koray Wasaarada Warfaafinta oo uu Xukun ka dhacay. NUSOJ waxay Wasaarada Warfaafinta iyo Wasaarada Shaqada ka geysay dacwad guddiga xukuma ILO ee qaada dacwadaha ku aadan xadgudubyada loo geysto ururada shaqaalaha sida NUSOJ, uuna guddigan caalamiga ahi go’aan lid ku ah labada wasaaradood kasoo saaray November 2015.

 

Marka Wasaarada Warfaafinta oo intaas oo xukun ah laga helay, ayna ka dambeysay adeegsiga Hay’adda Sirdoonka iyo Nabad Sugida Qaranka si loo hor istaago qabsoomida shirka guud ee NUSOJ ee dhici lahaa 13-14 February 2016, in hadana ururka NUSOJ uu soo dhaweeyo guddi ay sameysay isla Wasaarada oo xalin khilaafaad ah waxaa uu ururku muujiyay niyad wanaag aan hagrasho ku jirin.

 

Haddaba markii uu ururku arkay in guddigii laga weeciyay wadadii iyo howshii marka hore loo sameeyay, si bareer ahna loogu adeegsaday ku xadgudbida dastuurkii ururka & go’aankii maxkamada, NUSOJ waxay cadeyneysaa:

 

1.    In kalsoonidii iyo wada shaqeyntii ay kala laabatay Guddiga Xalinta Khilaafaadka Saxaafadda.

 

2.    In aysan jirin cid ku matasha ama afka, fikir ama mowqifka ururka NUSOJ ku hadli karta guddigan dhexdiisa.

 

3.    In go’aan kasta oo uu soo saaro guddiga uunan wax saameyn ah ku laheyn ururka NUSOJ, xubnahiisa iyo hogaankiisaba.

 

4.    In aan ku wargelineyno dhamaan xubnaha ururka iyo dhamaan saxaafadda Soomaaliyeed in markii Wasaarada Warfaafinta looga adkaaday sharciga caalamiga ah iyo sharcigii dalka, ayna si sharci daro ah u adeegsatay Hay’adda Sirdoonka iyo Nabad Sugida Qaranka, ay markaan qaab kale usoo marayso si ay ula wareegto ururka taasoo aan ku dhisneen sifo sharci Soomaaliyeed iyo mid caalami oo ay Soomaaliya saxiixday.

 

5.    In ay ku wargelin doonto bulshada caalamka in ay ka foojignaato khiyaanada cusub ee loosoo hagoogay guddiga oo ay tahay xadgudub aan meel cad loosoo marin oo la doonayo in suxufiyiinta Soomaaliyeed ee xubnaha ka ah NUSOJ loogu diido in ay ururkooda si xor ah oo ka madax-banaan Wasaarada Warfaafinta ay u maamushaan.

 

6.    In aan 10 March 2016 ay NUSOJ horgeyn doonto ILO dhamaan gabood falada aan kor kusoo xusnay oo ay ku jirto guddigan, hor istaaga sharciga dalka, ku xadgudbida dastuurka dalka iyo adeegsiga aan sharciga ku dhisneen ee Hay’adda Sirdoonka iyo Nabad Sugida Qaranka ee Wasaarada Warfaafinta si suxufiyiinta looga hor istaago xuquuqdooda dastuuriga ah.

 

7.    In Ururka oo kaashanaya Ururka Suxufiyiinta Adduunka iyo Ururada Kale ee Caalamiga sida ILO, ITUC iyo IFEX uu codsan doono 10 March in dowladda Soomaaliya loo gudbiyo Maxkamada Caalamiga ah ee Cadaalada (International Court of Justice) maadaama xadugubku noqday sharci caalami iyo mid Soomaaliyeed, Wasaaradihiina diideen in ay sharciga dhowraan.

 

8.    In aan u cadeyneyno madaxda sare ee dalka in Wasaaradaha ay masuul ka yihiin dhamaan wixii magac xumo iyo bahdilaad ah ee dowladda Soomaaliyeed guud ahaan ku dhaco maadaama ay ayagu diideen in ay dhowraan xuquuqda saxafiyiinta; xornimada & madax-banaanida NUSOJ iyo sharciga Soomaaliyeed iyo midka caalamka u dagsan.  

 

9.    In ay tahay ayaan daro weyn in halkii ay muwaadiniinta Soomaaliyeed ay xaqoodo difaaci lahaayeen in Wasaaradihii dalka nooqdeen aalad loo adeegsado jabinta iyo ku tumashada shuruucda dalka u degsan iyo kuwa caalamiga ah si muwaadiniinta Soomaaliyeed loo dulmiyo.

 

NUSOJ waa XOR, Sareynta Sharciga Ha Shaqeyso!!!

 

Cumar Faaruuq Cusmaan

XOGHAYAHA GUUD